Halalbihalal Paguyuban Pasundan, Gupernur Dedi Mulyadi: Momentum Ningkatkeun Kasadaran Spirit Kabudayaan

LBNews.com. KOTA BANDUNG,- Gubernur Jawa Barat Dedi Mulyadi ngayakeun halalbihalal jeung Keluarga Besar Paguyuban Pasundan di Mandala Saba dr. Djoendjoenan Gedung Paguyuban Pasundan Kota Bandung, Sabtu (12/4/2025)/.

Turut hadir dina ieu acara teh Jaksa Agung ST Burhanuddin, Wakil Menteri Pendidikan Dasar dan Menengah Atip Latipulhayat, Gupernur Jabar manten, para kepala daerah sa-Jabar, jeung puluhan Tokoh Sunda lainna.

Dedi nyebutkeun, silaturahmi jeung para Tokoh Sunda kacida pentingna dilakukeun pikeun kamajuan Jabar jeung Indonesia. Seug komo Paguyuban Pasundan ngabogaan spirit kabudayaan anu luhur ajenna.

“Ieu pan spirit kabudayaan nyah, jeungna Paguyuban Pasundan napak kana dasar-dsar kabudayaan,” ceuk Dedi.

“Ngawangun spirit yen aspek kasundaan kudu ngabogaan mangpaat keur ka-Indonesiaan. Eta hal nu paling utama,” tambahna

Nurutkeun KDM – sebutan akrab Dedi Mulyadi – danget kiwari, loba tokoh Sunda anu manggung di tingkat nasional. Inyana nyebutkeun para tokoh Sunda kudu merhatikeun kinerja nu hade jeung jadi tuladan pikeun nu lina.

“Mun asalna ti Sunda kudu nembongkeun kinerja nu hade tur jadi tuladan pikeun nu lain,” ceuk Dedi nandeskeun.

Sawatara, Ketua Umum Pangurus Besar Paguyuban Pasundan Didi Turmudzi mitutur yen salian nguatkeun peran tokoh Sunda, ieu acara silaturahmi oge fokus pikeun ngawangun krisis basa jeung simbul nu meh leungit. Inyana ngarasa optimistis kahadiran Gupernur Jabar Dedi Mulyadi bakal mawa spirit jeung motivasi warga pikeun sadar kana budayana.

“Kahadiran Pa Gupernur Jawa Barat ngajadikeun motivasi keur warga sakumna mulangkeun kasadaran kana budayana,” ceuk Didi.

Didi nyebutkeun, Paguyuban Pasundan geus sapakat rampak gawe jeung Pemda Provinsi Jabar Jabar pikeun ngawangun pusat budaya Sunda anu legana 50 hektar teu jauh ti Bandara Kertajati Majalengka.***

Editor: Dadan Sungkawa