Tah, Ieu kakara Menyala, Cara Gupernur Jakarta Pramono Anung Ngangkat Martabat Budaya Betawi

LBNews.com. JAKARTA – Gupernur Jakarta Pramono Anung nembongkeun sikep tuladan keur para pamingpin anu ngakuna nyaah kana budaya tradisional, padahal dina prakna mah omon-omon wungkul. Pramono mere conto anu hade.

Inyana negeskeun, yen budaya Betawi – warna budaya khas daerah anu dipingpinna – mudu diangkat ka tingkat anu leuwih luhur ajenna sangkan henteu diremehkeun. Ulah nepi ka dilecehkeun.

Gebragan anyar anu dilakukeun Pramono nyaeta ngalarang ondel-ondel dipake ngamen. Nurutkeun inyana, ieu tarekah teh ngandung tujuan sangkan budaya Betawi ulah ngan saukur dijadikeun barang hiburan jalanan tanpa ajen, tapi kudu dipernahkeun minangka bagean tina warsan budaya anu leuwih ngabogaan martabat.

Teu meunang ondel-ondel dipake ngamen. Sangkan budaya Betawi undak darajatna, jadikeun budaya anu dipikahormat ku sing saha bae. Lain malah budaya dipake ngamen! Kitu ceuk Pramono dina acara Sarasehan III Kaukus Muda Betawi, Jakarta Utara, Senin (2/6/2025)

Inyana geus mere instruksi ka Dinas Kebudayaan jeung para wali kota ulah sakali-kali deui ngijinan kana aktivitas model kitu, hususna di ruang-ruang public.

Minangka gantina, Pramono ngajangjikeun nyadiakeun fasilitas 42 sanggar ondel-ondel pikeun minton dina acara-acara resmi Jakarta.

Tarekah ngupayakeun promosi budaya, Pemprov Jakarta oge ngajak sapuluh hotel bintang lima pikeun ngayakeun nuansa Betawi boh tina sisi tampilan seni budaya kitu deui katuangan khas Betawi ka para tamu.

Nurutkeun pangakuan Pramono, Ieu geus dicontoan di Hotel Borobudur. Malah geus aya kana dua bulanna, Hotel Borobudur saban poe teu weleh nyadiakeun katuangan khas Betawi.

Pramono oge ngungkabkeun yen kawasan Blok M, danget kiwari keur dikembangkeun jadi puseur budaya Betawi.  

Ieu Kawasan teh engkena bakal disulap jadi etalase utama pikeun seni, kuliner jeung budaya khas Betawi ajangkeuneun warga katut para wisatawan.

Pikeun ngarojong mobilitas, pihak Pemprov Jakarta  ngintregasikeun system transportasi umum Transjabodetabek anu nyambungkeun Blok M jeung wilayah-wilayah saperti Bogor, Ancol, PIK, jeung Alam Sutera.

Pramono ngingetan yen upaya mulasara budaya Betawi henteu meunang eureun dina simbol-simbol wungkul. Inya miharep budaya Betawi bisa manggung kalawan leuwih ngabogaan kelas, dipikawanoh sacara luas jeung tetep jadi kareueur warga Jakarta.

“Dina urusan kabetawian ieu, ulah ngan cukup ku simbol-simbol wungkul,” ceuk Pramono.***

Diropea ku Dadan Sungkawa (Sumber Kompas)