Kadishub Kab. Bandung, Hilman Kadar: Mudik Gratis Pemkab Bandung, Mere Layanan Transportasi Aman tur Nyaman

LBNews.com. SOREANG, – Kepala Dinas Perhubungan Kabupaten Bandung Hilman Kadar nyebutkeun, dumasar kana faktor kasalametan, Pamarentah Kabupaten Bandung, dina hal ieu Dinas Perhubungan ngalaksanakeun program mudik gratis taun 2025. Ieu program teh samata-mata ditujukeun pikeun mere fasilitas masarakat Kabupaten Bandung anu rek mudik jeung lebaran di lembur sarakan.

Fasilitas mudik gratis ieu, nurutkeun Kadishub, maksudna mah sangkan masarakat leuwih mentingkeun faktor kasalametan waktu ngalaksanakeun perjalanan pulang kampung atawa mudik. Insyaallah, pihakna siap nyadiakeun kendaraan anu ngabogaan standar kaselamatan, ceuk Hilman.

Inyana miharep ku ayana program mudik gratis, masarakat teu kudu maksakeun pulang kampung atawa mudik ngagunakeun sapeda motor. Seug komo nepi ka boncengan jeung nambah bagasi di bagian tukangna.

Ieu bakal ngaganggu kana kasaiimbangan jeung konsentrasi waktu ngajalankeun kandaraan. Lain wae ngabahayakeun kulawargana, dalah oge bisa ngabahayakeun ka nu lain, jelas Hilman.

Hilman nyebutkeun, samemeh dilakukeun pikeun ngalayanan masarakat nu rek mudik, sakabeh kandaraan anu disiapkeun, samemehna geus dilakukeun pamariksaan laik jalan kendaraan bermotor (ranpcheck) anu dilakukeun ku fungsional penguji kendaraan bermotor.

“Alhamdulillah, kandaraan ieu sadayana parantos nyumponan pasaratan laik jalan,” Hilman nandeskeun.

Lintang ti kitu, disebutkeun ku Hilman, pikeun ngaminimalisir human error, para supir jeung kondekturna (pengemudi katut asisten pengemudi) sakabehna geus dilaksanakeun pamariksaan kasehatan anu dilakukeun ku Dinas Kesehatan Kabupaten Bandung.  

Disebutkeun oge, kalayan dijejeran motto mudik tahun 2025 nyaeta mudik aman keluarga nyaman, kegiatan mudik gratis anu dilaksanakeun saban taun ieu teh geus narik animo masarakat. Ieu luar biasa pisan

Hilman netelakeun, pendaptaran program mudik gratis lebaran taun 2025 dimimitian tanggal 19 Pebruari 2025 nepi ka 28 Pebruari 2025 ngaliwatan link pendaptaran ku cara ngagunakeun google form.  Ukur dina waktu jero 32 jam lilana, 700 kuota mudik nu disadiakeun geus ledis. Hebatna deui, sanggeus diputuskeun link pendaptaran terus dibuka, tapi diumumkeun pikeun asup daptar tunggu, lobana 488 urang warga kadaftar dina waiting list mudik gratis Pemkab Bandung. Arinyana daek nunggu saupama aya nu mudik ngundurkleun diri. Ieu hiji apresiasi nu luar biasa di kalangan masarakat kana program Bupati Bandung, ceuk Hilman.

Hilman nyebutkan 14 bus armada mudik gratis anu diinditkeun sacara total bisa ngalayanan 700 urang warga nu mudik , dilaksanakeun kalayan 2 kota tujuan mudik, nyaeta Surakarta atawa Solo jeung Yogyakarta.

Hilman oge ngalaporkeun ka Wakil Bupati Bandung, yen dina taun ieu Pemkab Bandung narima  corporate sosial responsibility atau CSR ti Bank BJB Cabang Soreang. “Alhamdulillah Bank BJB nambihan 2 armada bus kanggo warga masyarakat Kabupaten Bandung nu ngalaksanakeun mudik lebaran. Ieu ngarupikeun perhatian nu luar biasa sareng kalintang ngabantosna,” pokna. ***