Koperasi Desa/Kalurahan Merah Putih sa-Kabupaten Bandung Sagancangna Ngawujud, Kang DS: Biayana ditangkes tina APBD Kabupaten Bandung

LBNews.com. SOREANG, – Bupati Bandung Dadang Supriatna nyebutkeun siap pikeun nyukseskeun program Presiden Prabowo Subianto tumali jeung sagancangna ngayakeun Koperasi Desa/Kelurahan Merah Putih.

Ieu hal teh diungkab Bupati Bandung dumasar kana Instruksi Presiden (Inpres) Republik Indonesia Nomor 9 Tahun 2025 tentang Percepatan Pembentukan Koperasi Desa/Kelurahan Merah Putih.

Sabada narima ieu Inpres, Bupati Bandung bareng jeung para Ketua DPK (Dewan Pimpinan Kecamatan) APDESI (Asosiasi Pemerintahan Desa Seluruh Indonesia) sa-Kabupaten Bandung, Ketua APDESI  Kabupaten Bandung, Kepala Dinas Koperasi dan UKM (Usaha Kecil dan Menengah) Kabupaten Bandung katut para Asisten ngalaksanakeun rapat konsolidasi, Soreang, poe Rebu (9/4/2025).   

“Kanggo nyukseskeun program Pa Presiden ngabentuk Koperasi Desa Merah Putih sa-Kabupaten Bandung, biayana dutangkes tina APBD Kabupaten Bandung,” ceuk Bupati anu harita langsung dipapag ku rasa gumbira ti para Ketua DPK APDESI jeung Ketua APDESI Kabupaten Bandung di Rumah Dinas Bupati Bandung di Soreang.

Kang DS, sebutan akrab Dadang Supriatna, miharep dina waktu nu sagancangna jeung mudah-mudahan bulan April 2025  sakabeh Koperasi Desa/Kelurahan Merah Putih sa-Kabupaten Bandung bisa karengsekeun tur geus ngadeg. Ieu hal minangka wangun respon gancang tina sikep Bupati Bandung dina ngawujudkeun Koperasi Desa/Kelurahan Marah Putih di Kabupaten Bandung.

“Neda pidu’ana bae, sareng sim kuring siap ngalaksanakeun program Pa Presiden tumali sareng  Koperasi Desa/Kelurahan Merah Putih se-Indonesia, hususnya di Kabupaten Bandung. Hatur nuhun ka sadayana. Mugia tinekenan nu dimaksud, sareng sukses salawasna,” pokna.

Lintang ti ngawujudkeun program Koperasi Desa/Kalurahan sa-Kabupaten Bandung, pihak Pemkab oge baris sagancangna ngalaksanakeun program Makan Bergizi Gratis (MBG) sa-Kabupaten Bandung.

Dijelaskeun, Instruksi Presiden Republik Indonesia Nomor 9 tahun 2025 ngeunaan Percepatan Pembentukan Koperasi Desa/Kelurahan Merah Putih, maksudna nyaeta ngarupakeun tarekah pikeun ngajurung kamandirian swasembada pangan nu terus-tumerus minangka wujud transformasi Asta Cita kedua jeung pangwangunan ti desa enggoning ngawalatrakeun ekonomi sakumaha harepan Asta Cita Presiden Prabowo ngahontal mangsa Indonesia kaemasan 2045, diantarana ngawujudkeun Koperasi Desa/Kelurahan Merah Putih, ti mimit ngadegkeun, ngamekarkeun jeung revitalisasi koperasi di desa/kelurahan.

Pikeun ngawujudkeunana, perelu lengkah strategis nu saluyu, integrasi, jeung teu lesot tina koordinasi antar kementerian/lembaga jeung pamarentah daerah ngudag kana optimalisasi jeung ngawujudna Koperasi Desa/Kelurahan Merah Putih anu sagancangna. (dsk.)**