Minangsaraya ka Wakil Ketua DPR RI, Pemkab Bandung Meredih Pangwangunan Polder jeung Tanggul Walungan Cikapundung Kolot, Bisa Gancang Direalisasikeun

LBNews.com. DAYEUHKOLOT, – Sababaraha tempat di wilayah Kabupaten Bandung geus jadi langganan banjir. Lain anyar-anyar. Tapi ti baheula. Nu jadi lokus utamana, nyaeta di wewengkon Bojongsoang, Baleendah, jeung Dayeuhkolot.

Ieu hal teh kaungkab nalika Bupati Bandung Dadang Supriatna mapag kadatangan Wakil Ketua DPR RI Cucun Ahmad Syamsurijal ngalaksanakeun sidak ka lokasi banjir di Desa Dayeuhkolot Kacamatan Dayeuhkolot Kabupaten Bandung sakalian masrahkeun bantuan ka parakorban banjir, Salasa (11/3/2025) nak.

Pangna kitu teh sabab saban turun hujan, kawasan Dayeuhkolot kawas nu jadi bulan-bulanan, jadi daerah sasaran banjir. Memang enya lain di Dayeuhkolot bae, dalah daerah sejenna ge, nu saampar mah, wayahna ngalaman nasib nu sarua , “Memang lain di wilayah Dayeuhkolot wae,” ceuk Bupati Bandung.

Dadang Supriatna nyebutkeun intensitas hujan nu kaliwat ekstrim, jadi salasahiji faktor nu jadi sabab-musababna. “Utamana di kacamatanan Dayeuhkolot, Baleendah, Bojongsoang, Majalaya, jeung deuih Rancaekek. Di sababaraha lokasi ge, diantarana alatan darmaga nu jebol. Sawarehna deui ku ayana tempat patepungna muara walungan anu tangtu wae debit cai kawilang badag, jelasna.

Di sababaraha lokasi, Kang DS ngajelaskeun conto banjir di Desa Panyadap kacamatan Solokanjeruk nu ngabalukarkeun walungan sering jebol akibat tahanan wangunan tanggul jeung sasak anu teu sabanding.

Legana walungan jeung jumlah debit cai henteu cukup kawadahan, temahna cai mudal ka jalan jeung nyerang lahan palemburan. Solusi di daerah Panyadap kuduna aya retensi minimal 5 hektar atawa ngalegaan badan walungan Sungalah nu ngaliwatan Desa Panyadap. Nya kaasup ngaluhuran jambatan. Sabab lamun henteu diluhuran cai bakal terus mudal. Aliran cai nyerang ka pamukiman warga, ceuk Dadang Supriatna ngajelaskeun panjang lebar.

Kang DS ge nepikeun pasualan banjir anu remen ngeyembeng di kawasan Cidawolong Desa Biru Kecamatan Majalaya Kabupaten Bandung. Inya ngajelaskeun, dumasar kana catetan sajarah walungan di Kawasan Cidawolong samemehna lebarna 11 meter. Ari ayeuna walungan nu aya di kawasan Cidawolong lebarna ngan tinggal 3 meter. Ceuk Bupati, ieu ge perelu ditertibkeun, kaasup ngondang para pemilik lahan, aya 6 urang anu keur diajak supaya bisa ngahibahkeun lahan sisi walungan, “Sangkan bisa dilebaran kalayan ulah aya ganti rugi.”

Lintang ti ngondisikeun di lingkungan sabudeureun Cidawolong, bupati ge ngahaja ngayakeun komunikasi jeung Gupernur Jawa Barat, tinggal kuma programna, naha rek didanaan ku APBD provinsi atawa bisa oge sacara pentahelix.

Upama pentahelix, bupati siap ngayakeun rampak gawe jeung Kapolresta, Dandim, jeung ngondang para pangusaha. Cara anu kungsi dilakukeun di daerah Rancaekek jeung Cicalengka, anu memang dilakukeun sacara pentahelix, tur aya hasilna nyugemakeun.  

Satuluyna di wilayah Dayeuhkolot jeung Baleendah, Sakumaha anu dilaporkeun ka Wakil Ketua DPR RI. Bupati Kang DS baris ngupayakeun panggih jeung BBWSC (Balai Besar Wilayah Sungai Citarum), sabab meh  2,1 km panjangna kudu dilakukeun pangwangunan tanggul di aliran walungan Cikapundung Kolot. 

Kaasup aya opat jambatan anu kudfu diluhuran. Ieu oge sempet dilaporkeun ka Kepala BNPB (Badan Nasional Penanggulangan Bencana). Harita Kepala BNPB geus ngajngjikeun mere Rp 30 miliar. “Nepi ka danget kiwari teu aca baya realisasina,” pokna.

Alatan kitu, Kang DS minangsaraya bantuan ka Wakil Ketua DPR RI, sakumaha anu dijangjikeun Kepala BNPB, “Ieu bisa ngantu dan segera untuk diturunkan di Kabupaten Bandung. “Sabab pihak BNPB geus ngajangjikeun sekitar Rp 30 miliar,” ujarnya.

Kang DS oge meredih Sekretaris Daerah Kabupaten Bandung, lantaran di lokasi banjir aya sakola. “Jadi sakola ieu mah, mun usum banjir teu bisa ngalaksanakeun proses diajar. Solusina naha pindah atawa saperti kumaha, nu penting perlu Langkah Langkah konkrit pikeun ngarengsekeunana, pokna deui

Kang DS oge meredih bantuan jeung dukungan suport ti Wakil Ketua DPR RI ngeunaan panambahan polder. Ari polder teh nyaeta sistem anu digunakeun pikeun ngokolakeun cai di darah dataran handap. Polder ngabogaan kagubaan pikeun ngurangan resiko banjir. Dina usum hujan, polder bisa difungsikeun keur panampungan cai.

Ku ayana kunjungan kerja Wakil Ketua DPR RI, Cucun Ahmad Syamsurijal ka Kabupaten Bandung pikeun ngalaksanakeun tugas kadinasan, moga-moga bae aya solusi nu bisa diandelkeun pikeun mantuan ngarengsekeun masalah banjir di Kabupaten Bandung.***