Komara Penca Silat dina Film Barat

Naskah: Agah Nugraha

Editor: Dadan Sungkawa

Rada mending mimiti taun 90-an nepi ka taun 2000-an ieu, beuki réa masarakat Barat, Asia Pasifik, Afrika nu waranoh, kana penca silat, anu asalna ti Indonesia. Maranéhnanna gé mingkin paham, yén penca asal Indonesia téh, réa pisan aliranna. Saperti aya pencak silat Sunda, penca Jawa Minang, Bali, Bengkulu, Aceh jrrd. Ngan hadéna téh penca silat urang katulungan ku promosi gratis tina film The Raid seri 1 jeung seri 2 (2012) nu sukses di Eropa, utamana éta film di Inggris paling loba penontonna.

Salah sahiji surat kabar terbitan Inggris, nulis laporan nu jejerna, “The Raid Take Silat to The World,” Film The Raid geus ngangkat penca silat (Indonesia) ka tahap interenasional,” cenah Kitu deui di Ameriks Serikat, film tema silat nu dibintangan ku aktor Uko Uwais, Yayan Ruhiyan jeung Cecep Arif Rahman téh, geus nyedot penonton nepi ka leuwih ti 2 juta penonton, atawa sarua jeung box office rengking ka 11 atawa film ka 11 panglarisna di Amerika. Tah, sacara tae langsung film The Raid produksi “Merantau Film,” nu disutradaraan, Garet Evans, kalahiran Inggris téh, sahanteuna geus jadi promosi gratis pikeun kamekaran penca bangsa urang di mancanagara. Buktina urang Barat nu harayang dialajar pencak silat pasca film The Raid 1 & 2 mangkin undak.

Lantaran disutradaraan ku urang Inggris, Garet Evans, atuh hasilna, jurus–jurus penca teh dikemas dina wangun adegan-adegan aksyen versi Barat. Hasilna teu bina jeung film-film kung fu nu oge disutradaraan ku para sutradara Barat, nu diaktoran ku Bruce Lee, Jacky Chan jeung Jet Li. Malah mah taun 2015 ieu, para pamaen The Raid, Uko Uwais jeung instrukturna Yayan Ruhiyan, jago penca urang Tasik, nu ogé milu maén dina éta film, ogé Cécép Arif Rahman, geus teken kontrak pikeun ngaramékeun film produksi Hollywood kasohor, serial Star Wars nu kungsi jadi salah sahiji film box office dunia. Fim Star Wars serial panganyarna teh, ayeuna masih syuting di Amerika, jadi tiluanna keur aya di Amerika, nu cenah eta film nu rea penggemarna nu teh baris dirilis Desember 2015. Hollywood, nu diwakilan ku film Star Wars kaasup geus nyieun torobosan anyar, anu mana produser jeung sutradarana leuwih kaitut ku jurus penca Indonesia batan kung fu atawa karate. Ari ku kitu téa mah Hollywood mémang sok nampilan nu alanyar, tah, penca silat urang, dianggap hal nu bisa ngirut nu nongton sabab ari kung fu mah, meureun geus dianggap ngabosenkeun.

Méméhna, Uko Uwais nu mintonkeun kahebata jurus-jurus pencak, ogé geus ngirut aktor jeung sutradara Hollwood, Keanu Reeves, nu ngajak Uko ngaramékeun film besutanna, The Main Of Tai Chi nu oge dieuyeuban aktor-aktor laga karate jeung kung fu asal Jepang jeung Hongkong.  Uko jeung Yayan tampil deui dina film laga séjénna, Beyond Skyline, nu aktor utamana, Brock Rumlow nu jadi boga lalakon dina film Captein America, The Wiunter Soldier, Frank Grillo. Tina opat film nu dibentangan ku Uko, Yayan jeung Cecep, kana tangtu ieu teh, beuki nanjeurkeun komara penca silat di dunya Barat.

Salah sahiji bukti, suksesna aktor-aktor film laga boh versi urang, boh versi Hollywood, nu dibintangan ku nu enya-enya ngawasa jurus-jurus penca khas Indonesia, nepi ka aya urang Ingris instruktur gulat nu hayang leuwih wanoh kana penca, nu aslina aya di Indonesia. Urang Ingris nu ngaranna Johnny Silmon (41), kungsi ngulayaban ka padépokan-padépokan penca di sawatara wewengkon di di Indonesia. Malah Silmon nu momot awakna 97 kg téh, kungsi ngadongdon kota Bandung, da cenah ngadéngé béja yen di Ujung Berung, aya paguron gulat tradisional Sunda nu katelah bénjang. Nya éta pelatih gulat téh ngalap élmu bénjang ka Ena Mulyana, pelatih benjang di Ujung berung. Aya kana samingguna Silmon dipeuseuh élmu benjang ku Ena. Henteu benjang bae, éta bulé Inggris téh diajar ogé penca Sunda.***