Desa Sukamaju, Kecamatan Majalaya Respon Penataan Desa, Warga: Satuju jeung Ngadukung Desa Balekambang jadi Desa Persiapan nu Mandiri

LBNews.com. MAJALAYA, – Warga nu sumebar di 20 RW Desa Sukamaju Kecamatan Majalaya Kabupaten Bandung kacida satuju jeung ngadukung penataan desa atawa pemekaran desa. Ieu hal dibuktikeun ku ayana spanduk di unggal wilayah RW di Desa Sukamaju.

Salasahiji tulisan dina spanduk teh, diantarana, “Kami warga Kampung Ciwalengke RW 08 Desa Sukamaju Kecamatan Majalaya Mendukung dan Menyetujui Pemekaran Desa Sukamaju”.

Tulisan spanduk anu nadana sarua ditepikeun warga RW 09, anu eusina, “Selamat dan Sukses Atas Terwujudnya Pemekaran Desa Tahun 2025”. Lintang ti kitu, aya deuih tulisan sejenna: “Kami Seluruh Warga Masyarakat Kampung Ciwalengke RW 09 Desa Sukamaju Kecamatan Majalaya Menyambut serta Mendukung Sepenuhnya Atas Tercapainya Pemekaran Desa Tahun 2025 Untuk Mewujudkan Kesejahteraan Masyarakat Untuk Kedepannya”. “Desa Sukamaju, Spirit Memakmurkan Desa, Kecamatan Majalaya Bangkit, Kabupaten Bandung Bedas”.

Hal anu sarua diungkabkeun warga Kampung Balekambang RW 18 Desa Sukamaju dina tulisan spandukna. “Kami warga RW 18 Desa Sukamaju Kecamatan Majalaya Mendukung dan Menyetujui Pemekaran Desa Balekambang Menjadi Desa Persiapan yang Mandiri. Perjalanan Baru, Semangat Baru”.

Spanduk-spanduk anu nadana meh sarua ditepikeun oge ku warga RW-RW lianna di desa Sukamaju. Anu intina, warga ngarasa satuju jeung siap ngarojong Penataan Desa atawa Pemekaran Desa.

Wangun dukungan ti warga Desa Sukamaju tumali jeung wacana pamekaran desa teh, nyusul tina rarancang Pamarentah Kabupaten Bandung ngaliwatan Dinas Pendataan Masyarakat dan Desa (DPMD) ngayakeun kagiatan Sosialisasi Arah Kebijakan Penataan Desa dan Peraturan Menteri Dalam Negeri RI Nomor 1 tahun 2017 tentang Penataan Desa di Kabupaten Bandung.

Diinformasikeun di Kabupaten Bandung, aya sakitar 125 desa diwacanakeun layak pikeun dimekarkan.  Danget ayeuna, aya 270 desa jeung 10 kelurahan di Kabupaten Bandung.

DPMD Kabupaten Bandung salila bulan suci Ramadan 1446 Hijriyah kaliwat, geus ngarengsekeun ngalaksanakeun Sosialisasi Arah Kebijakan Penataan Desa di salapan titik lokasi anu asup ka 31 kecamatan atawa tujuh dapil sa-Kabupaten Bandung.

“Kalebet diantawisna Desa Sukamaju anu janten sasaran pemekaran atanapi penataan desa,” ceuk Kepala Desa Sukamaju Acep Handana di Desa Sukamaju, Minggu (13/4/2025).

Nurutkeun Acep Handana, ku ayana dukungan jeung kasapukan ti warga nu sumebar di 20 RW sa-Desa Sukamaju, tangtuna pihak pamarentah desa bakal terus ngaliwatan proses tahapan pemekaran desa. Diantarana, ngalaksanakeun musyawarah desa (musdes) pikeun persetujuan jeung dukungan ti sajumlah unsur di lingkungan masyarakat Desa Sukamaju, anu saterusna diusulkeun ka pihak Pemkab Bandung ngaliwatan DPMD.

“Desa Sukamaju memang tos layak dimekarkan, margi jumlah padumukna ngahontal 19.214 jiwa. Sawatara, syarat jumlah penduduk kanggo ngabentuk desa di Kabupaten Bandung minimal 2.500 jiwa atanapi 500 kepala keluarga,” pokna.

Salian ti jumlah padumuk, nurutkeun pangakuan Acep, faktor lain nu bisa ngadukung pamekaran desa Sukamaju, lega wilayah Desa Sukamaju oge geus nyumponan pasaratan, nyaeta legana 274 hektar.

Disebutkeun Kepala Desa Sukamaju, aya kalana desa nu wilayahna lega sering pisan ngalaman pangwangunan anu nyabeulah alatan kawates ku anggaran.

“Tujuan pemekaran Desa Sukamaju ieu teh kanggo ngayakeun pangwangunan anu sagancangna sareng ngawalatrakeun pangwangunan di daerah,” ceuk Acep Handana.

125 Desa Layak Dimekarkeun

Diberitakeun samemehna, Dinas Pemberdayaan Masyarakat dan Desa (DPMD) Kabupaten Bandung geus ngarengsekeun kagiatan dilaksanakeunana sosialisasi Arah Kebijakan Penataan Desa dan Peraturan Menteri Dalam Negeri RI Nomor 1 tahun 2017 tentang Penataan Desa di salapan titik lokasi.

Pamungkas, poe Kemis (13/3/2025) atawa kagiatan sosialisasi anu kasalapan kalina, Pemkab Bandung ngaliwatan DPMD Kabupaten Bandung ngalaksanakeun sosialisasi ieu program strategis Bupati Bandung teh di Aula Kecamatan Pasirjambu Kabupaten Bandung. Kagiatan sosialisasi anu sarupa dilaksanakeun oge di delapan titik lokasi lainnya di Kabupaten Bandung.

Samemehna, DPMD melaksanakan kegiatan sosialisasi ieu program strategis Bupati Bandung teh di Kecamatan Banjaran; Kecamatan Margahayu; Desa Lengkong Kecamatan Bojongsoang; Kecamatan Cileunyi; Kecamatan Cicalengka; Kecamatan Paseh dan Kecamatan Pacet.

Tata Irawan ngajelaskeun, dilaksanakeunana sosialisasi penataan desa teh dumasar tina lajuning laku hasil kajian tumali jeung pemekaran desa anu dilakukeun akademisi atawa pihak paguron luhur dina taun 2021.

“Dumasar hasil kajian, aya sakitar 127 desa di wilayah kabupaten Bandung tos layak dimekarkan.  Mung sabada dilakukeun pendataan ulang, tina jumlah penduduk sareng kepala keluarga, dua desa lainna, teu lebet anu layak dimekarkeun, nyaeta Desa Indragiri sareng Desa Patengan Kecamatan Rancabali. Janten, sadayana aya 125 desa anu tiasa lebet kana layak kanggo dimekarkeun,” jelasTata Irawan.

Kadis PMD Kabupaten Bandung ngaku, perangkat desa ti 125 desa geus diondang dina kagiatan sosilisasi. Inyana miharep perangkat desa ti 125 desa saterusna ngalaksanakeun musdes (Musayawarah Desa). Salila musdes kudu enya-enya dilaksanakeun  sahade-hadena, sangkan ulah nepi ka nimbulkeun pasualan ka hareupna.

Tata Irawan nyebutkeun, musdes nu dilaksanakeun teh dina enas-enasna mah pikeun nyawalakeun  kasapakatan, naha desa rek terus nohonan proses pemekaran atawa henteu.

Lamun mah siap nohonan proses pemekaran, hasil musdes-na ditepikeun ka Bupati ngaliwatan DPMD pikeun saterusna dilakukeun pamariksaan maju kana tahap persiapan pemekaran. Tapi, lamun mah henteu siap dimekarkeun, naon nu jadi alesanana. Alesanana tetep kudu winangun tinulis minangka dasar panolakan pamekaran desa, jelas Tata Irawan.

Tata Irawan miharep ka para perangkat desa sangkan turut ngahadiran sosialisasi tumali jeung wacana pemekaran desa, anu satuluyna disosialisasikeun deui ka masarakat sangkan masarakat enya-enya paham tumali jeun urgensi pemekaran desa, boh mangpaat pamekaran desa atawa sarat pemekaran desa

Jadi, Tata nambahkeun, masarakat kudu enya-enya paham, naha naon pemekaran desa teh. Maksudna supaya ulah nepi ka jadi pasualan ka hareup. Sabab, tina pamekaran desa teh aya resiko anu teu bisa kasinglar ku masarakat, seperti identitas kependudukan bakal barobah, seperti KTP, SIM, sertifikat jeung identitas kependudukan lainna,” katanya.

Tata Irawan oge miharep ka para perngkat desa bisa nepikeun mangpaat pamekaran desa ka masarakat.

Nurutkeun tata Irawan, ku ayana pamekaran desa bisa ningkatkeun efisiensi dan efektifitas pamarentahan. Ngaronjatkeun kualitas hirup masyarakat, ningkatkeun  kamampuan desa dina ngokolakeun  sumber daya alam jeung potensi desa, sarta ningkatkeun partisipasi masyarakat.

Saterusna Tata Irawan oge nyebutkeun, yen masarakat kudu enya-enya paham urgensi pamekaran desa, saperti alatan jumlah padumuk, lega wilayah desa, tingkat kasulitan geografis desa, kualitas layanan publik, ningkatkeun kamampuan ngokolakeun SDA (Sumber Daya Alam) jeung potensi desa, ningkatkeun anggaran bantuan pusat ka daerah.

Harepan tina pamekaran desa, ajen kualitas layanan leuwih hade tur leuwih mekar. Bisa oge minangka tarekah keur ningkatkeun sumber daya alam lanataran masih keneh aya sumber daya alam anu tacan kagali jeung kamomorekeun.

Syarat Pemekaran Desa

Tata Irawan nyebutkeun sarat pamekaran desa, kahiji minimal unur desa lima tahun. Kadua nyumponan syarat jumlah penduduk. Katilu, ngabogaan akses transfortasi antar wilayah. Kaopat, sosial budaya nu bisa nyiptakeun rukun hirup, masarakat social anu napak kana adat-istiasat desa.

Kelima, ngabogan potensi sumber daya alam jeung sumber daya penduduk. Kagenep peta batas wilayah nu geus netep tur ditetepkeun dina aturan penduduk. Katujuh sarana jeung prasarana pikeun pamarentah desa jeung layanan publik.

Kadalapan, kasadiaan dana operasional jeung penghasilan tetap jeung tunjangan lainna pikeun perangkat pamarentahan sakumaha katangtuan Perundang-Undangan. Kasalapan, desa ngawengku wilayah cantilan atawa dusun.

“Persyaratan nu paling penting nyaeta musyawarah desa. Sabab ku ayana musyawarah desa sakumna warga bisa ngahontal kasapakatan,” ceuk Tata Irawan dina pamungkas kateranganana. (dsk)**

 Editor: Dadan Sungkawa