Dina Biantara Idulfitri 1446 H., Kang DS Optimalkeun 13 Program Strategis Pemkab Bandung

LBNews.com. SOREANG, – Dina pituturna anu ditepikeun salila biantara idulfitri 1446 H. di Masjid Al Fathu Soreang, Komplek Pemkab Bandung, Senen (31/3/2025), Bupati Bandung Dadang Supriatna nyebutkeun, yen dina perjalanan pangwangunan di taun 2025, Pemkab Bandung bakal terus ngoptimalkeun 13 program strategis. Sajalan jeung sairing perjalanan panjang anu geus kaliwat, Kabupaten Bandung ngalaman parobahan signifikan tina sarwaning aspek nu rupa-rupa.

Kahiji, indeks pembangunan manusia (IPM) Kabupaten Bandung taun 2024 ngahontal 74,59 poin, ningkat 0,56 poin dibandingkeun taun 2023 anu ngahontal 74,03 poin.

Bupati Bandung Dadang Supriatna nyebutkeun, ningkatna IPM sakumaha anu disebutkeun, bisa katedunan ku ayana kontribusi indeks pendidikan 65,89 poin, indeks kesehatan 84,97 poin jeung indeks pengeluaran (daya beli) 74,12 poin. 

Kedua, tingkat angka kamiskinan taun 2024 anu gedena 6,19 persen, turun 0,21 persen tina taun 2023 sakitar 6,40 persen. Nurutkeun Kang DS – landihan akrab Bupati Bandung Dadang Supriatna – turunna tingkat kamiskinan ekstrim Kabupaten Bandung nu asalna 1,22 persen di taun 2023, di taun 2024 turun jadi 0,50 persen.

Ketilu, laju pertumbuhan ekonomi Kabupaten Bandung taun 2024 ngahontal 5,04 persen. ieu LPE teh leuwih luhur ajenna dibandingkeu jeung LPE nasional atawa provinsi.

Kaopat, tingkat pengangguran terbuka (TPT) dina taun 2023 ngahontal 6,52 persen, turun di taun 2024 menjadi 6,36 persen.

Kalima, husus pikeun widang infrastruktur, Pemkab Bandung geus ngayakeun realisasi pangwangunan 5 RSUD anyar, nyaeta RSUD Bedas Cimaung, RSUD Bedas Kertasari, RSUD Bedas Tegalluar, RSUD Bedas Arjasari jeung RSUD Bedas Pacira.

Kagenep, pangwangunan jalan mantap di Kabupaten Bandung ningkat tina 68,60 persen dina taun 2023 jadi 76,38 persen dina taun 2024. Bupati ge nargetkeun dina taun 2025, 89,73 persen jalan di Kabupaten Bandung aya dina kondisi mantap, pokna neundeun harepan.

Katujuh, program rehabilitasi rumah tidak layak huni (rutilahu) di Kabupaten Bandung ditargetkeun 7.000 unit per taun, “Alhamdulillah, dina kurun waktu 2021-2024, tos kahontal 39.347 unit rutilahu, ngalangkungan target anu tos ditetepkeun,” pokna.

Kadalapan, disektor pendidikan, danget kiwari geus dibangun 27 SMP anyar, turta dina raraga ngabentuk SDM anu mibanda ahlak mulia tur mibanda karakter ku cara nerapkeun 3 muatan lokal tingkat TK, SD, jeung SMP, ngawengku pendidikan Pancasila dan UUD 1945, pendidikan basa jeung budaya Sunda turta diajar ngaji jeung ngapalkeun Al-Quran.

Salapan, realisasi program insentif guru ngaji di Kabupaten Bandung dina taun 2023 ngahontal 15.666  urang atawa  97,92 persen tina target 16.000 urang. Dina taun 2024, jumlah nu narima mangpaat ningkat jadi 15.861 urang atawa 99,13 tina target. Ieu program teh dirojong kalayan alokasi anggaran anu gedena Rp 67,2 miliar, kalayan realisasi anu gedena Rp 66,39 miliar.

Disebutkeun, ti taun 2023, pihak Pemkab ge geus ngarealisasikeun insentif pakeun ustadz-ustadzah, takmir jeung marbot masjid kaasup BPJS Ketenagakerjaan, kalayan target nu narima 4.000 urang per taun kalayan total anggaran Rp 4,8 miliar, pokna.

Sapuluh, dina upaya ningkatkeun sumber daya manusia jeung rata-rata lama sekolah, Pemkab Bandung geus ngalaksanakeun program Beasiswa Ti Bupati (Besti) kalayan realisasi anggaran Rp 1,09 miliar dina taun 2022, Rp 2,97 miliar dina 2023, jeung Rp 5,75 miliar dina taun 2024. Ti taun 2022 nepi ka 2024, ieu program teh geus mere mangpaat ka 455 mahasiswa.

Salian ti Besti, pihak Pemkab ge ngalungsurkeun program beasiswa Indonesia emas daerah (BIED) kalayan kuota 50 mahasiswa per tahun pikeun ngadukung akses pendidikan anu leuwih lega ambahan .

Sabelas, di widang lingkungan, persentase volume runtah anu dikokolakeun di Kabupaten Bandung terus nambahan. Dina taun 2023, runtah anu dikokolakeun ngahontal 81,09 persen, jeung dina taun 2024 ningkat signifikan jadi 87,65 persen.

Bupati umajak ka sakumna masarakat sangkan leuwih merhatikeun lingkungan dina ngokolakeun runtah ku cara ngurangan, milah jeung ngayakeun daur ulang pikeun rupa-rupa kapentingan.

Duabelas, Kabupaten Bandung oge terus satekah polah nunjukkeun komitmenna dina tata kelola pamarentahan nu bersih. Sacara mayeng, geus 8 kali noron Pemkab Bandung kabiruyungan Opini wajar tanpa pengecualian (WTP) dina hal penyampaian laporan keuangan pemerintah daerah. Atuh dina upaya nyinglar korupsi sakumaha program monitoring center for prevention (MCP) ti KPK-RI, Kabupaten Bandung kacatet 92,47 persen dina taun 2023, ningkat kana 93 persen dina taun 2024.

Tilubelas, sakur kamajuan anu geus ditembongkeun teh henteu ngan saukur nuduhkeun kaberhasilan pamarentah daerah, tapi oge deuih jadi bukti nyata yen sinergi antara pamarentah, masarakat jeung sakabeh pamangku kapentingan dina pangwangunan kabupaten Bandung nu leuwih maju.

Bupati Bandung oge miharep pikeun terus nguatkeun sinergi, rampak gawe jeung kontribusi aktif dina pangwanguna daerah. Ku sikep sauyunan babarengan jeung sinergi, hayu urang wujudkeun Kabupaten Bandung nu leuwih Bedas, maju jeung terus-tumerus ngahontal mangsa Indonesia kaemasan, pokna deui.

Dina celah-celah biantarana. bupati oge nyebutkeun teu aya pipisahan nu leuwih pikasediheun kajaba ti pipisahan jeung bulan Ramadhan. Sabab di jerona, urang sakabeh bisa ngarasa dianteur sacara lalaunan pikeun tepi ka titik fitrah, nyaeta titik anu ngajadikeun ciciptan nu leuwih bersih tur suci.  

Dibarengan sora takbir jeung tahmid turta kesadaran pikeun sililubarkeun, bupati ngawilujengkeun lebaran Idulfitri 1 Syawal 1446 Hijriyah, “Mudah-mudahan urang sadaya lebet kana golongan jalmi-jalmi anu anu kenging kamuliaan bulan suci Ramadhan sareng mampuh pulang kana kasucin nu fitrah,” pungkasna.***