Guguritan Dalem Bandung, Mieling Hari Jadi ka-384 Kabupaten Bandung (Bag. 8)

Rumpaka: Dadan Sungkawa

Radén Adipati Wiranatakusumah IV (1846-1874 M.)

SINOM

Suryakarta Adiningrat

Keur mangsa jadi kumetir

Digentra ku ingkang rama

Nuluykeun tahta dinasti

Titis waris Dipati

Nyepeng kalungguhan agung

Pikeun ngolah nagara

Ngabdikeun diri ka nagri

Tatar Bandung boga pamingpin sajati

Dijujuluk Dalem Bintang

Sabada ngadeg bupati

Kamasyhur ku motékarna

Dugdeg wangunan arantik

Kantor, sakola jeung masjid

Seni budaya dipaju

Puseur sagala widang

Sugih harta sugih harti

Dalem Bintang lir béntang murag ti langit

Ménak somah sarakola

Mun hayang loba pangarti

Kari junun jeung daékna

Teu kudu dipaké sulit

Asal baé sing rajin

boga élmu pangaweruh

Moal beurat mamawa

Jadi murid nu sajati

Gedé guna keur kamajuan nagari

Dina mangsa Dalem Bintang

Kina paselang jeung kopi

Hasilna matak gumbira

Nyukupan keur saban nagri

Ubar langka di bihari

tumuwuh tangkalna subur

Jang  ubar malaria

Méméh aya ubar lain

Pasir Junghunh saksina di tepis wiring

Di Gambung mah uplak-aplak

Kebon entéh nu mimiti

Tambah hégar katingalna

Rajol nu datang kataji

Usaha terus ngamukim

ngabukbak leuweung nu liwung

arusaha buniaga

melak entéh kina kopi

héjo ngémploh nganteg di pasir jeung lamping.◘