Pemkab Bandung Gelar Maleman Nuzulul Qur’an: Al-Qur’an Pituduh Utama Sakumna Umat Manusa

LBNew.com. SOREANG, – Pamarentah Kabupaten (Pemkab) Bandung ngalaksanakeun Malem Nuzulul Qur’an di Masjid Al Fatir Rumah Dinas Bupati Bandung Komplek Pemkab Bandung, Soreang, Minggu (16/3/2025) malem.

Turut hadir dina ieu acara teh jajaran Forkopimda Kabupaten Bandung, nyaeta  Bupati Bandung HM. Dadang Supriatna, Wakil Bupati Bandung Ali Syakieb, Dandim 0624/Kabupaten Bandung Letkol Inf. Tinton Amin Putra, jeung wawakil jajaran Polresta Bandung. Hadir oge deuih  Ketua MUI Kabupaten Bandung KH. Yayan Hasuna Hudaya, Ketua BAZNAS Kabupaten Bandung H. Yusuf Ali Tantowi. Kitu deui Sekretaris Daerah Kabupaten Bandung  Cakra Amiyana, para Asisten, Staf Ahli,  jeung para Kepala Dinas, Kepala Badan, para Camat jeung para pejabat di lingkungan Pemkab Bandung lainna. Katingal oge Bunda Bedas Kabupaten Bandung Hj. Emma Dety Dadang Supriatna, para Direktur BUMD, para Direktur Rumah Sakit jeung para undangan lainnya yang turut hadir pada peringatan Nuzulul  Qur’an tersebut.

Bupati Bandung Dadang Supriatna turut ngucapkeun alhamdulillah lantaran masih bisa ngalaksanakeun maleman Nuzulul Qur’an, 17 Ramadan 1446 Hijriah. Kagiatan Nuzulul Qur’an teh dibarung jeung mere santunan ka barudak yatim.

Bupati Bandung ngungkabkeun, yen Al-Qur’an teh papagon keur sakumna umat Islam dina ngajalankeun hirup sapopoe.  Al-Qur’an nu dilungsurkeun dina bulan Ramadhan jadi pituduh utama keur sakumna umat manusa. Henteu ngan saukur mieling Nuzulul Qur’an wungkul, tapi masing bisa nga-implementasikan jeung ngamalkeunana sakumaha eusi kandungan Al Qur’an, pitutur Bupati dina pamapagna.  

Bupati nyebutkeun yen mieling Nuzulul Qur’an, lungsurna wahyu Allah SWT ka Rasulullah Muhammad SAW. 

Sakumaha firman-Na dina Al-Qur’an surah Al-Baqarah ayat 185:

“Bulan Ramadhan nyaeta (bulan) nu dijerona diturunkeun Al-Qur’an, pikeun jadi pituduh ka sakumna manusa jeung katerangan-katerangan saperkara pitunjuk ieu jeung nu ngabedakeun (antara bener jeung batil)” pokna.

Disebutkeun, lungsurna Al-Qur’an ngarupakeun kajadian monumental nu mawa pangaruh ka manusa tina kabodoan nungtun kana cahaya elmu.

“Kitab suci Al-Qur’an munggaran dilungsurkan dina ping 17 Ramadan, jadi pertanda awalna parobahan dina peradaban manusa,” pokna deui nuluykeun hanca pituturna.  

“Salaku umat Islam, urang sadaya ngagaduhan kewajiban kanggo ngajantenkeun Al-Qur’an papagon hirup, boh kahirupan masarakat, bangsa katut nagara, “ ceuk Kang DS – landihan akrab Dadang Supriatna.

Nurutkeun Kang DS, Al-Qur’an ngajarkeun niley-niley kaadilan, paduluran jeung karaharjaan umat. Visi udagan ngawujudna Kabupaten Bandung nu leuwih bedas, maju tur terus-tumerus ngahontal Indonesia Emas, tangtuna henteu bisa lesot tina dadasar utama Al Qur’an nu jadi padoman, hususna dina ngawujudkeun indikator masarakat nu agamis.

“Di jaman modern ayeuna, geus teu usum deui aya nu buta hurup, komo buta kana Al-Qur’an. Pangna kitu, sim kuring meredih ka sadayana para sepuhna murangkalih malar tiasa ngaping murangkalihna kanggo diajar maca sareng maham eusining Al-Qur’an,” pokna negeskeun deui.

Kang DS mitutur, yen Pemkab Bandung geus netepkeun program prioritas, nyaetu realisasi insentif guru ngaji turta nga-implementasikeun pangajaran maca jeung ngapalkeun Al-Qur’an dina muatan lokal kurikulum pendidikan di tingkah SD jeung SMP.

“Harepanana, sakumna murid SD-SMP di Kabupaten Bandung tiasa lancar maca tur nyangkem ayat-ayat Al-Qur’an,” harepnya.

Ngaliwatan ieu program, Kang DS teu weleh neundeun harepan gede bisa nyiptakeun generasi Qur’ani anu henteu ngan sakur cerdas intelektual, tapi oge mibanda ahlak nu hade, karakter nu pengkuh didadasaran ku niley-niley agama dina satiap aspek kahirupan.

Para guru ngaji oge dipiharep leuwih fokus tur sumanget dina ngaping generasi nonoman sangkan tumuwuh jadi insan nu leubeut ku pangaweruh, iman tur takwa harepna.

Ngaliwatan kagiatan Nuzulul Qur’an ieu Bupati Bedas teh niharep masarakat beuki mikacinta Al Qur’an, lancar macana, paham eusi kandunganana jeung bisa ngamalkeun niley-nileyna dina kahirupan sapopoe.

Pamungkas, Bupati umajak ka sakumna kaum muslim di Kabupaten Bandung, numuwuhkeun pamahaman nu enya-enya tur daria ngeunaan Al Qur’an, tuluy ngalarapkeunana dina kahirupan kalayan pinuh kasadaran tur suhud. “Muga-muga bae, urang tiasa ngawujudkeun masarakat nu agamis turta tiasa masihan kontribusi kana pangwanguann Kabupaten Bandung nu leuwih bedas, maju tur terus-timerus ngahontal Indonesia Emas,” pokna gede harepan.***

Dadan Sungkawa/Sumber: Humas Kab. Bandung