Ketua Yayasan Al Hasani Ukur Nanda Tangan NPHD, Dana Hibah Rp 600 juta Alih Tangan Ka Pihak Lain

LBNews.com, PACET. – Bulan November nepi ka Desember 2024 nak, Pamarentah Propinsi Jawa Barat geus ngagolontorkeun Dana Hibah anu ditarima ku sababaraha yayasan nu sumebar di wilayah kabupaten jeung kota nu ngokolakeun widang Pendidikan pasantren, masjid, madrasah diniyah jeung sajabana. Tangtu we lain dana leutik-leutik, rata-rata mah ninggang di angka Rp 100 juta ka luhur.

Pikeun maluruh kamana losna dana hibah provinsi anu direcah keur kapentingan rahayat loba teh, koresponden LB News.com ngahaja maluruh ka sababaraha Yayasan di wilayah Kabupaten Bandung. Nurutkeun samatara nu kapaluruh, diduga masih keneh aya nu papalimpang jeung tojaiyah sakumaha anu dipiharep. Malah aya sawatara Yayasan anu narima mangfaat, henteu jelas alamatna alias henteu dipikawanoh ku masarakat sabudeureunana.

Salasahijina, Yayasan Insan Mujadid Cemerlang anu lokasina di kampung Tenjonagara Rt 02 Rw 02 desa Mekarjaya Kecamatan Pacet, malah henteu loba nu apal. Tong boro teh wargana, dalah pangurus kampung, boh pihak RT atawa RW satempat, sarua loba henteu apal. Padahal, eta Yayasan teh narima dana hibah kawilang gede ngahontal angka Rp 650 juta.

Aya deui nu rada aneh. Di Desa Mekarjaya, nu boga Yayasan nginjeumkeun Yayasan ka pihak sejen pikeun meunangkeun dana hibah nepi ka cairna.  Nu boga Yayasan mah ngan semet nepi ka proses NPHD (Naskah Perjanjian Hibah Daerah). Da sakabeh dana hibah mah dicekel jeung dilarapkeun ka nu nginjeumna. Ieu hal teh kaalaman ku ketua Yayasan Al Hasani, Ustadz Hashim. Nurutkeun sawatara sumber, Yayasan Al Hasani pingpinan Hashim meunang dana hibah Propinsi Jawa barat anu gedena ngahontal angka Ro 600 juta.

Ditepungan di tempat ngajarna, Ketua Yayasan Al Hasani ustadz Hashim, anu sapopoena ngajar jeung mingpin di Raudhatul Athfal Al-Muslim kalayan gamblang nyaritakeun kronologis datangna bantuan dana hibah ka Yayasan anu diadegkeunana.

“Nawis ari NPHD mah (Naskah Perjanjian Hibah Daerah, Red.) tapi teu ngiring bintekna mah, soalna ti ngawitan pengajengan dugi ka RAB teu apal nanaon,” walon Ketua yayasan Al Hasani tegas dengan bahasa Sunda yang jelas.

“Tiluan eta teh, Pa Wildan, Pa Guri, Pa Alit malah tos beres ngadamel LPJ-na. Abdi sama sekali teu terang. Sakadar nambut Yayasan hungkul pedah itu teh pun lanceuk. Eta bangunana di Cirehe. Pun lanceuk gaduh santri teu gaduh bangunan. Kaleresan abdi gaduh yayasan, ‘sok angge yayasan abdi ngan abdi tong dibabawa’. Ngan pedah nu tiluan eta tea, pokona nambut akte bahasana teh, malah naros aya kontribusi teu ka abdi, nya engke geus beres cenah. Can aya nanaon ka abdi oge pedah karunya ka mang Dede. Sareng pan aya pa Guri mun teu lepat mah anjeuna Tim ahli anggota DPRD Propinsi anu ti PAN. Jadi pangajengan ngalangkungan anu tiluan eta pokona mah pasti cair weh,” Ceuk ketua yayasan Al Hasani mere katerangan.

Sawatara di tempat nu misah, tegesna di RA Raudhatul Athfal Al-Muslim, ibu Imas istri ketua Yayasan Al Hasani teu enya loba komentar. Inyana malah leuwih kana mere saran pikeun nepungan kepala desa Mekarjaya lamun arek konfirmasi tumali bantuan dana hibah propinsi Jawa Barat anu katarima ku Yayasan milik carogena.

“Abdi mah sakadar ngabantos, mangga sagala rupina taroskeun langsung ka pa Kades.” Walon Ibu Imas, istri ketua Yayasan Al Hasani basa ditepungan di Raudhatul Athfal Al-Muslim

Kades Mekarjaya, Didin basa ditepungan di kantorna ngajelaskeun yen pangwangunan tina dana hibah provinsi teh kaasup dibawah naungan yayasan sakumaha kasapakatan kadua belah pihak. “Eta teh bangunan kerjasama jeung Yayasan, hayang ngembangkeun pendidikan. Urusan fisikna nitah ka alo, di dieu. Pangnyieunkeun anggaran di ditu meureun. Mun dibangunkeun di ditu, kahiji euweuh lahan, nu kadua hayang ngembangkeun pendidikanana di dieu. Lamun dibawah naungan yayasan mah teu nanaon sesuai kesepakatan weh. Ari dibangun atawa kegiatan mah teu kedah sesuai domisili bade dimana wae ngan tempatna yayasan kudu akur jeung tempat domisili, nu penting dibawah binaan yayasan. Jadi bentuk pertanggung jawaban tetep Yayasan, oge ikut bertanggung jawab,” ceuk Kades Mekarjaya.

“Nu kadua, nu kudu paham teh nu ngaranna SDM di kampung kadang kala sok jararang paham masalah kieu, meureun pahamlah kumaha situasi di kampung di dieu. Kajeun nginjeumkeun ge tetep ari perkara ari enggeus henteuna eta pembangunan kudu ngilu tanggung jawab. Jeung pan satu atap, nya ieu jeung teu gaduh yayasan ieu cuman dina pelaksanaana meureun karena lantaran SDM-na kurang. sieun salah sieun kumaha nya teu nanaon nuduhkeun ka desa oge. Ari sayah mah seuri weh da warga di dieu, di dieu bapana nya otomatis selaku pembina nya teu nanaon. jeung eta mah lepat pemahaman tentang alur yen kadesna teh pedah kieu yen kadesna saeutikna meureun dulur manehanana padahal menurutkeun kitu mh teu mais teu meuleum. Ngan ari abdina mah nganggap wajar rek menta tulung rek naon naon oge da urang bapana. Rek dipanggil si Guri da manehna inspiratorna, wayahna sok ngobrol hade hade da manehanana komitmen ti awalna Yayasan eta siap ngabantu tina alur anggaran dibawah binaan yayasan, aya suatu pertanggung jawaban.” Jelas Didin, kepala desa Mekarjaya kecamatan Pacet, panjang lebar.

Sawatara salasaurang praktisi tindak pidana korupsi (TIPIKOR) nu ngaranna menta dirusiahkeun, nyebutkeun yen Ketua Yayasan Al Hasani bisa wae keuna pidana alatan nanda tangan NPHD anu kamuat dina klausul penggunaan hibah oleh penerima. Ketua Yayasan Al Hasani teu meunang sagawayah nginjeumkeun Yayasan ka pihak sejen ku alesan naon wae. Terus teh bangunana, sanajan sawilayah atawa satu atap tetep we salah lantaran teu boga akte, “Itu jelas ketua Yayasan nu salah. Sanajan asup kana wilayah binaan kegiatan, tapi kudu kacantunkeun dina akte yayasan,” jelasna. (Gun)***