Yayasan Penerima Bantuan Dana Hibah di Cijagra Ilang Laratan, Kades Kusnadi: Apal Ge Henteu
Pamarentah Desa Cijagra ngalarapkeun Bantuan Dana Hibah Prov Jabar taun 2024 dina kagiatan pelaksanaan pekerjaan Hotmix jalan lingkungan, di Kampung Legokteureup kalayan panjang 330 m2 jeung lebar 2 m2.*** 
LBNews.Com. Paseh, – Dana hibah Provinsi Jawa Barat anu diawurkeun ka masarakat taun 2024 ngahontal trilyunan rupiah. Ieu dana teh kudu dijalankeun jeung dikokolakeun sacara efektif bari jeung mertimbangkeun efisiensi. Kitu anu ditepikeun PJ Gubernur, Bey Machmudin samemeh kapilihna Kang Dedi Mulyadi jadi Gupernur Jawa Barat
Bey negerskeun, yen penting diperhatikeun sual akuntabilitas hibah, dimana jumlah nu narimana kaitung euyeub lantaran sacara administrasi pasaratan hibah kacumponan. Tapi urusan pengawasan di lapangan lain hal anu gampil, sabab proses post audit sacara mandiri teu mungkin kudu salawasna dilakukeun.
Nurutkeun Bey, niat mere hibah memang hade, ngan lamun salah prosedur, komo deui disalahgunakeun, pasti nagara karugian. Ti awal mula, pokna, proses dana hibah kudu taliti jeung selektif. Jeung kudu dipastikeun yen nu narima hibah salian nyumponan pasaratan administrasi, oge kudu nerapkeun pertanggungjawaban nu bener.
Nurutkeun sawatara data, Total dana hibah Pemprov Jawa Barat dina 2024 gedena ngahontal angka Rp 5 triliun, kaasup hibah dina kagiatan pemilihan kepala daerah (Pilkada). Naek ti nu taun 2023 sakitar Rp 3,6 triliun.
Hanjakalna, dina palebah panggunaanana sok remen timbul penyelewengan tina tujuan awal pamarentah. Misilna bae, panarima bantuan henteu ngagunakeun samistina sakumaha anu kauni dina perjangjian awal. Ieu hal teh bakal ngandung resiko badag, malah resiko hukum bisa katibankeun.
Pemprov Jabar, sakumaha aturan perundang-undangan geus satekah polah ngamalirkeun dana bantuan hibah ka masarakat anu geus nyumponan pasaratan. Kaasup dana bantuan hibah anu geus disalurkeun ka masarakat Kacamatan Paseh, Kabupaten Bandung, diantarana Desa Cijagra gedena Rp 100 juta. Oge aya deuih anu dikamalirkeun ngaliwatan Yayasan, nyaeta diantarana Yayasan Wahdatul Mubarok (Kp. Cijagra Rt 03 Rw 07, Desa Cijagra, Kacamatan Paseh) gedena Rp 150 juta jeung Yayasan Al Murtala, gedena Rp 200 Juta. Tapi, geuning tempo disusud ka lokasi alamat Yayasan sakumaha anu kacatet dina data panarima dana hibah, alamat eta dua Yayasan teh henteu aya laratanana di desa Cijagra, Kacamatan Paseh, Kabupaten Bandung.
Ditepungan di kantorna, Selasa 11 Maret 2025, kepala desa Cijagra, Kusnadi ngaenyakeun yen desa Cijagra narima dana hibah ti Provinsi Jabar taun 2024 gedena Rp 100 juta. Eta dana bantuan hibah teh, nurutkeun Kades Kusnadi, “Alhamdulillah tos dilarapkeun,” pokna.
Inyana nyebutkeun dana bantuan hibah teh dilarapkeun pelaksanaan pekerjaan Hotmix jalan lingkungan, “Hotmix dilaksanakan di Kampung Legokteureup kalayan panjang 330 m2 jeung lebarnya 2 m2, mangga bilih bade ditinggal mah hasil padamelanana,” ceuk Kades Cijagra ngabageakeun.
Sedengkeun waktu disabit ngeunaan 2 yayasan nu narima bantuan hibah Pemprov Jabar, Kades Kusnadi nyebutkeun teu apal nanaon jeung teu aya hubungan sama sakali, “Teu aya di data desa, apal ge henteu,” pokna negeskeun. (Gun).***
